Басты Жаңалықтар Қазақ инженерінің жобасы АҚШ-та үздік атанды

Қазақ инженерінің жобасы АҚШ-та үздік атанды

29.11.2025 17:08

АҚШ-тың инвесторлары қазақ өнертапқышының туындысына қызығып отыр. Вашингтонда «Defence TechConnect» деп аталтын ауқымды конференция өтті. Онда озық ойлы инженерлер жаңа жобаларын ұсынған. Әлемнің әр түпкірінен жиналған өнертапқыштар 200-ге жуық тың жоба ұсынды. Солардың ішінде қазақстандық Ерлан Әлімхановтың ойлап тапқан дүниесі үздіктер қатарынан табылды.

«Қазақстаннан шыққан инженер». Ерлан Әлімханов бүгінгі жиында өзін осылай деп таныстырып жүр. 2021 жылы Американың талант визасына ие болған кездегі арманы да осы еді - ұсынған жобасы арқылы елдің абыройын асқақтату. Ол ойлап тапқан дрон бұрынғылардан ерекше. 360 градусқа айналатын вертикалды модулі бар құрылғы түрлі бағытта қызмет ете алады.

Ерлан Әлімханов, инженер-дизайнер:

Қазақстаннан шыққан инженердің АҚШ-тағы дрон әзірлеушілердің үздік ондығы қатарына енуі — үлкен мәртебе. Мен бұған шын көңілден қуаныштымын. Әрі кеудемді елім үшін зор мақтаныш кернеп тұр. Америкалықтар Қазақстанда да білікті инженерлер мен озық ойлы мамандардың бар екенін біле жүрсін.

Ерлан екі жыл тынымсыз ізденіп, MegaDrone 360 дронын жасап шыққан. Бұл әмбебап құрал. Денсаулық сақтау саласынан бастап, әскери бағытқа дейін қолдануға болады. Вашингтондағы сарапшылар тап осы әскери тұрғысынан дронға үлкен сенім артып отыр.

Уильям Хюз, бизнес бойынша кеңесші:

Бұл конференция ең алдымен қорғаныс саласындағы ауқымды жиын. Соңғы жылдары дәл осы салада дрондардың маңызы жоғары жылдамдықта артып барады. Украина - бұған мысал. Ал Ерлан Әлімхановтың дроны әскери тұрғыдан да тамаша олжа. Себебі оның 360 градуста айнала алатын қабілеті бар. Бұл майдандағы стратегияны өзгертуі мүмкін.

Ерлан мұнымен тоқмейілсіп қалмайды. Құрылғыны одан әрі дамытып, ірі инвестиция тартуға мүдделі. Егер дроны нарыққа шықса бағасы шамамен 60 мың доллар болмақ,- дейді өнертапқыш.

Автор

Жалғас Сәдібекұлы

Бөлісу