Қаптамасы құлаған үй: Ауыр жарақат алған фельдшер көз жұмды

Астанада үстіне кондиционер құлап кеткен 23 жастағы фельдшер ауруханада көз жұмды. Ұлдана Мырзуан жансақтау бөлімінде 10 күн жатты. Бірақ аса ауыр жарақаты дес бермеді дейді дәрігерлер.

Еске салсақ, оқыс оқиға 8 қараша күні елордадағы тұрғын үйлердің бірінде болды. Үйдің сыртқы кірпіш қаптамасы құлап, тұрғындар жапа шекті. Ұлдана оқиға орнына жеткен жедел жәрдем бригадасының құрамында болған еді. Ол жапа шеккендерге жәрдемдесіп жүрген мезетте кондиционер қондырғысының бөлшегі басына құлаған. Сол күні жансақтау бөліміне Ұлданадан бөлек тағы бір фельдшер түскен еді. Оның жағдайы жақсарды. Қазір бейінді бөлімде ем алып жатыр.