Президент кәсіпкерлерді өздері туған ауылдарды өркендетуге шақырды

Ауыл шаруашылығы дамыса, ең алдымен ауылдың жағдайы жақсарады. Бүгін Астанада өткен ауыл шаруашылығы еңбеккерлерінің екінші форумында Президент табысқа жеткен әрбір кәсіпкерді өз ауыл-аймағының өркендеуіне үлес қосуға шақырды. Мемлекет ауыл-аймақты дамыту үшін біраз жобаны жүзеге асырып жатыр. Инфрақұрылым салудан бастап, ауылға білікті маман тарту мәселесіне дейін ауқымды жұмыстар жүргізілді. Қасым-Жомарт Тоқаев соларға тоқтала келе, әкімдер де ірі компаниялармен келісім жасап, бірлескен шаруашылықтардың өнімін өткізуге көмектесуі қажет екенін айтты. Бұл ретте ауылға жеке инвестиция тарту өте маңызды.

Еңбекқор, мақсаты айқын азаматтарымыз күнделікті маңдай терімен ұлттық байлығымызды еселеп, ел келешегінің жарқын болуына аянбай үлес қосуда. Мұндай іспен айналысып жатқан адамдарға қолайлы жағдай жасап, еліміздің шынайы патриоттарын ынталандырып отыру керек. Біз бұл шаруаны назардан тыс қалдырмаймыз.