Маңғыстауда шенеуніктер 9 млрд теңгені мақсатсыз жұмсамақ болған

Маңғыстау облысында прокуратура органдары 9 млрд теңге бюджет қаржысының мақсатсыз жұмсалуын тоқтатты.

Заңбұзушылықтар облыстың барлық аудан-қаласында анықталған. Мәселен, Ақтау әкімдігі әрқайсы 6,7 млн теңгеге бағаланған 12 киіз үй сатып алмақ болған. Ал олардың нарықтағы құны төрт есе арзан. Қала көшелеріне жерасты қоқыс жәшіктерін орнату жобасына да тым жоғары баға қойылғаны белгілі болды. Прокурорлық қадағалаудың нәтижесінде 34 жауапты тұлға әкімшілік жауапқа тартылып, тағы жүзден астам адамға тәртіптік шара қолданылды.    

Олжас Айтуар, Маңғыстау облыстық прокуратурасының басқарма прокуроры:

Ақтау қаласының жергілікті атқарушы органымен, нәтижесінде прокуратураның қадағалау актісімен аталған сатып алу күшін жойды. 81,4 млн теңгені құрайтын бюджет қаражаты үнемделді. Тауарлардың жоғары бағалануы, артық және қажеттілігі жоқ тауар, жұмыс және қызметтерді сатып алуды жоспарлау, сондай-ақ бюджеттік өтінімсіз негізсіз қаражаттың бөлінуі деректері анықталды.