Димаш Құдайберген СNN телеарнасына сұқбат берді

Әлемге әйгілі, Қазақстанның халық әртісі Димаш Құдайберген Лондондағы концертінің алдында СNN телеарнасына сұқбат берді. Сегіз жыл бұрын Қытайдың ән байқауы арқылы жер-жаһаннан жанкүйер жинаған қазақ әншісінің дауыс диапазоны алты октаваға жететінін әлемдік музыка майталмандары мойындағаны белгілі. Ол 16 тілде ән айтады. «Жақында АҚШ-та Мэдисон скуер гарденде жеке концерті өтті, ал осы аптада Лондонда өнер көрсетпек» деп таныстырды Димашты телеарна жүргізушісі. Сұқбатта жүргізуші Димаштың Қазақстанда қайда білім алғаны жайлы, оның мансаптық жолының қалай басталғаны, сондай-ақ бірегей дауысының құпиясына қатысты сан алуан сұрақ қойды.

Макс Фостер, журналист:

Сізді алғаш тыңдаған кезде, сізді елдің нағыз мәдени елшісі екеніңізді түсіндім. Қазақстанды жер-жаһанға таныту сіз үшін қаншалықты маңызды?

Әрине, бұл менің басты миссиям. Мен атақ пен мансаптың, табыс пен олжаның соңында жүрген жоқпын. Менің арманым мен мақсатым – өз жерімнің, өзі елімнің тарихын, дәстүрін, мәдениетін, бейбітшілік пен махаббатын әлемге әйгілеу.