Басты Жаңалықтар Павлодардағы ипподром құрылысы қайта жанданды

Павлодардағы ипподром құрылысы қайта жанданды

11.11.2025 13:15

Павлодар қаласында салынып жатқан заманауи ипподром құрылысы осымен үшінші жылға созылып барады. Себебі мердігер компания өзіне жүктелген міндетті орындауға қауқарсыз. Тек қана Ертіс-Баян өңірі емес, еліміздің бірнеше аймақтарында бюджет қаржысына құрылыс жүргізу тендерлерін ұтып алған аты шулы «Градстройсервис» серіктестігінің ісі қазір сотта қаралып жатыр.

Мақпал Қаржаубай, Павлодар қаласы әкімінің баспасөз хатшысы:

Мердігер ұйым келісімшарт талаптарын орындамағандықта, 2025 жылғы 22 мамырда келісімшарт бұзылды. Осыған байланысты сот кабинеті ақпараттық жүйесі арқылы «Градстройсервис» мемлекеттік сатып алудың жосықсыз қатысушысы деп тану туралы талап арыз жіберілді.

Жақында бұрынғы мердігерден қалған 163 млн теңгені игеру үшін қайта конкурс өткізілді. Қазір құрылыс жүріп жатыр. Жыл аяғына дейін құрылыс-монтаждау жұмыстарын аяқтап, келер жылдың мамыр айында ипподром ашылады. Негізі Павлодарда осыдан небары 10 жыл бұрын жаңа ипподром салынған болатын. Бірақ кейін қаланың бас жоспарына түзету енгізіліп, дайын ипподромның орнына жаңа шағын аудан салу жөнінде шешім қабылданады. Алайда экологиясы нашар өндірістік аумақта тұрғын үй салуға облыстық прокуратура рұқсат бермеді.

Сәкен Талғат, облыстық Дене шынықтыру және туризмді дамыту басқармасының бөлім басшысы:

Басқа ипподром болмаған себепті қазіргі таңда «Құлагер» ипподромында жарыстар өткізіп жатырмыз. Өйткені қазіргі таңда Павлодар облысында басқа мүмкіндіктер болмаған себептен. Келесі жылдан бастап «Құлагер» ипподромында ешқандай жарыстар өткізілмейді.

Автор

Болат Аманбаев

Бөлісу