АҚШ-та үкімет жұмысының тоқтағанына 40 күн болды

АҚШ-та үкіметтің жұмысы тоқтағанына 40 күн болды. Бұл – ел тарихындағы ең ұзақ шатдаун. Бұған дейінгі рекорд та 2018-2019 жылдары Дональд Трамп әкімшілігі кезінде тіркелген, ол кезде үкімет 35 күнге жабылған еді.

Қазір Вашингтонда федералды мекемелердің көбі толық немесе жартылай жұмыс істемей тұр. 900 мыңнан астам қызметкер ақысыз демалысқа жіберілді, тағы шамамен 2 миллион адам жалақысыз жұмыс істеп жүр. Көлік министрі бұған дейін әуе қозғалысына қауіп төнуі мүмкін екенін ескертті. Егер жағдай тез арада шешілмесе, елдің кейбір аймақтарында әуе кеңістігі жабылуы мүмкін.

Бұл - қиын жағдай, өйткені бәрі белгісіз. Сол себепті олардың тезірек келісімге келіп, біз өз жұмысымызды – яғни америка халқы үшін қызмет етуді жалғастыра алсақ екен деймін.

Шатдаун тек мемлекеттік қызметтерге ғана емес, әлеуметтің әлсіз топтарына да соққы болып тиді. Қазіргі таңда әрбір сегізінші америкалық, яғни 42 миллион адам үкіметтен азық-түлікке қаржы алады, бірақ қаржыландырудың тоқтауына байланысты осы айда төлемдер толық жасалмады.

Мен Конгресс бұл жағдайды шешіп, үстіміздегі ауыр бұлтты сейілтсе екен деп үміттенемін, өйткені мен бұл туралы қатты уайымдап жүрмін. Бұл менің күнкөрісіме, еңбекақыма, жұмысқа баруыма және әріптестеріме тікелей әсер етеді.

Біздің ұстанымымыз айқын: Үкімет жұмысын қайта бастауы керек. Еңбекқор федералды қызметкерлерімізді қолдайық. Бұл елде өмір сүру тым қымбатқа түседі. Дональд Трамп пен оның тарифтері жағдайды жақсартып емес, керісінше, ушықтырып жатыр.

Экономистердің есебі бойынша, үкімет жұмысының тұралауынан ел экономикасына аптасына шамамен 15 миллиард доллар шығын келіп жатыр. Осылайша бұл қазірдің өзінде АҚШ тарихындағы ең ұзақ және ең қымбатқа түскен үкіметтің тоқтауы болып отыр.