Спортшыларымыз Токиода өтетін Сурдлимпиада ойындарына аттанды

Алматыда XXV жазғы Сурдлимпиада ойындарына спортшыларымызды шығарып салу салтанатты өтті. Шараға Туризм және спорт министрі Ербол Мырзабосынов қатысып, ұлттық құрамаға Мемлекеттік Туды табыс етті.

Дода 15–26 қараша аралығында Жапония астанасы - Токиода өтеді. Турнирге 80 елден жиналған 3 мыңға жуық спортшы 21 спорт түрі бойынша бақ сынайды. Ұлттық құрама бұл жарысқа 78 спортшымен қатысып, ел намысын абыроймен қорғауға ниетті. Спортшыларымыз осыған дейін 50-ден аса оқу-жаттығу жиынын өткізіп, 14 халықаралық турнирде бақ сынап, 98 медаль жеңіп алған. Бұл жолы спортшылар жеңіл атлетика, еркін және грек-рим күресі, бадминтон, үстел теннисі, жүзу, дзюдо, таеквондо секілді 8 спорт түрінен бәсекеге түседі.