Атырауда 100-ден астам тұрғын тегін заңгерлік кеңес алды

Атырауда «Халық заңгері» республикалық акциясы өтті. Жетекші адвокаттар мен заңгерлер, мемлекеттік органдардың басшылары 100-ден астам қала тұрғынына тегін заңгерлік кеңес берді. «Ашық есік» форматында өткен жиында қала тұрғындары алимент төлеу, жол төсеу, жарық тарту, инфрақұрылыммен қамту, білім беру және жұмысқа орналастыру сияқты өзекті мәселелер бойынша мамандардың көмегіне жүгінді.

Айкен Аманшин, Атырау қаласының тұрғыны:

Осы көп жылдан бері сот орындаушылардың жұмысына наразы боп жүр едім. Жинаған құжаттарымның барлығын бүгін көрсетіп, ол кісі заң жүзінде барлық шара қолданатынын жеткізді.

Мадияр Басшыбаев, Атырау облысының прокуроры:

Статистикаға жүгінсек, көбінде қылмыстық қудалау процесіне байланысты арыз-шағымдар болды. Бәрі тиісті органдармен қаралады. Басқа органдарға тиесілі болса, соларға жіберіледі. Бұл жерде бірде-бір арыз-шағым қараусыз қалмайды.

500 тұрғынға заң аясында тегін көмек көрсетілді

Ал Ақтауда «Халық заңгері» акциясы аясында 500-ге жуық тұрғынға тегін кеңес берілді.

Мамандар тұрғындардың заң, құқық төңірегінде туындаған барлық сұрақтарына және шешілмеген даулар бойынша көмек көрсетті.