Өзбекстанда жасыл энергияның үлесі артып келеді

Өзбекстанда жасыл энергияның үлесі 23 пайызға жетті. Осының арқасында жыл басынан бері 3 миллиард текше метрдей табиғи газ үнемделді. Атмосфераға шығарылатын зиянды заттардың мөлшері де айтарлықтай кеміп келеді. Энергетика министрлігінің мәліметінше, қазір елде 12 күн және 5 жел электр станциясы жұмыс істейді. Олардың жиынтық қуаты жылына 9 миллиард киловатт-сағатты құрайды. Су электр станцияларының саны кейінгі жеті жылда 36-дан 77-ге артқан. Өзбекстанда халық саны қарқынды өсіп келеді. Алдағы жылдары 40 миллионнан асады деген болжам бар. Тиісінше электр қуатына сұраныс еселеп артуда.
Журабек Мирзамахмудов, Өзбекстан республикасының энергетика министрі:

Жыл соңына дейін жасыл энергия көлемі 28 Гигаватқа жетеді. Ал 2030 жылға қарай жаңартылған қуат көздерінің үлесін 54%-ға жеткізу жоспарда бар. Тұрғындар шағын күн панельдерін өз үйінің шатырына орнатып, өндірілген қуатты пайдалана алады. Ол үшін кадастрлық құжат талап етілмейді.