Павлодар әуежайының жөндеу жұмыстары 2026 жылы аяқталады

Былтыр басталған Павлодар әуежайының ұшу-қону жолағын қайта жаңарту жұмыстары 2026 жылдың шілде айында аяқталады. Ал, қажетті қаражат заңсыз шығарылған активтерді елге қайтару есебінен беріледі. Бүгінде Үкімет арнайы қордан 9,3 млрд теңге бөлу туралы шешім қабылдап, бұл қаражат арнайы есепшотқа түсті. Қайта жаңарту жобасы ұшу-қону жолағын 45 метрден 60 метрге дейін кеңейтуді, заманауи жарық орнатып, бейнебақылау және дренаж жүйелерін жөндеуді қамтиды. Бұның бәріне 16,4 млрд теңгені қарастырылған. Бүгінде жоспарланған жұмыстың 47%-ы орындалды. Естеріңізге сала кетейік, аймақта былтырдан бері әуе қатынасы тоқтаған. Тіпті, қаржы болмауы себепті ұшу алаңындағы жөндеу жұмыстары 2027 жылға дейін созылады деп хабарланған.