Ақтауда көпқабатты үйде газ жарылды

Ақтауда тұрғын үйде газ жарылып, бірнеше адам зардап шекті. Жарылыс жертөледе болған. Оқиға орнынан тілшіміз Аягөз Оралбайқызы тікелей эфирге қосылды. Аягөз, адамдар аман ба?

Қайырлы күн, Айнұр! Жарылыс 32 шағын аудан «Азия» тұрғын үй кешенінің 83 үйдің жертөлесінде, таңертең сағат 9-да болған. Бұл 5 қабатты тұрғын үй. Газ жертөледегі кәсіпкерлік нысанда жарылған. Салдарынан екі ересек пен 3 бала зардап шегіп, ауруханаға жеткізілген. Төтенше жағдайлар департаментінен оқиға орнына 5 техника мен 15 адам, жедел медициналық жәрдем бригадасы дереу жеткен. Құтқарушылар газ жарылысы өртке ұласқанын айтады. Қазір өрт толық өшірілді. Жарылыстан жертөле бөлмелері мен бірінші қабаттағы пәтерлердің терезелері, іргелес тұрған тас қоршау жартылай қираған. Бірнеше көлікке зақым келген. Денсаулық сақтау басқармасының мәліметінше, аяқ-қолын 50 пайыз күйік шалған бір тұрғын жансақтау бөліміне жатқызылған. Газдың иісіне уланған тағы 3 бала дәрігерлердің бақылауында.