Оралда «Жас сақшы» полиция сыныбы ашылды

Республика күні қарсаңында Оралдағы қалалық №52 мектепте «Жас сақшы» полиция сыныбы ашылды.

Сыныпқа қызметтік міндетін атқару кезінде қаза болған полиция қызметкері Байжан Қазиевтің есімі берілді. Салтанатты шарада 24 бала ант беріп, кадет класына қабылданды. Іс-шара ел тыныштығы жолында жанқиярлықпен қаза тапқан азаматтың ерлігін дәріптеу, жас ұрпақты отансүйгіштікке баулу және құқық қорғау саласына қызығушылығын арттыру бағытында қолға алынды. Бұл – өңірде ашылып жатқан төртінші сынып. Сабақ аптасына екі рет болады. Полиция қызметкерлері, арнайы мамандар да келіп бала оқытады. Тек тәлім-тәрбие беріп қана қоймай, оқушылардың физикалық жағынан дамуына да күш салады.

Мансұр Тасқали, оқушы:

Кадет сыныбына қабылданбастан бұрын біз арнайы тест тапсырдық жүгіру, секіруден. Мен өскенде полиция қызметкері болғым келгесін, осы кадет сыныбына қабылдандым.

Қадыржан Сағын, облыстық ПД басқармасының бастығы:

Жас сақшыларды өзіміздің отанымызды қорғауға тәрбиелеп, осы оқуды бітіргеннен кейін Ішкі істер министрлігінің оқу орнына түсуге бағыт-бағдар беру мақсатында жасалып жатқан іс-шара.