Павлодарда «Тәуелсіздік ұрпақтары-2025» байқауының жеңімпаздары марапатталды

Павлодар облысында «Тәуелсіздік ұрпақтары-2025» байқауының жеңімпаздары марапатталды.

Байқау дәстүрлі түрде жыл сайын өткізіліп келеді. 35 жасқа дейін үміткерлер кәсіп, ғылым, білім, мәдениет, спорт, журналистика сынды он номинация бойынша сынға түседі. Биыл әр сала бойынша екі жеңімпаз анықталды. Оларға 500 мың теңгеден арнайы грант табысталды. Индира Садуақасова бес жыл бұрын мемлекет қолдауымен кәсібін ашқан. Жас кәсіпкер ет өнімдерін дайындаумен айналысады.

Индира Садуақасова, «Тәуелсіздік ұрпақтары-2025» байқауының жеңімпазы:

Біздің кәсіпорын шикізат өңдеумен айналысады. Еттен түрлі тағамдар дайындаймыз. Қалдықсыз өнім шығару технологиясын қолданып жатырмыз. Бүгінгі марапат менің жас кәсіпкер ретінде бастаған жұмысымның бес жылдағы нәтижесі деп ойлаймын. Мемлекетіміз бізге үлкен қолдау көрсетіп отыр.

Сондай-ақ бүгін озат оқушылар да марапатталды. 50-ден аса жеткіншекке «Тәуелсіздік ұланы» төсбелгісімен қатар 50 АЕК көлемінде сыйақы табысталды.