Парламенттік реформалар еліміздің саяси жүйесін одан әрі жаңғыртады

Иә, жиында Мемлекет басшысы парламентті реформалау Сенатты таратуға емес, еліміздің саяси жүйесін одан әрі жаңғыртуға бағытталғанына баса назар аударды. Бұл ретте мемлекеттік кеңесші Ерлан Қарин Telegram парақшасында «Күшті президент – ықпалды парламент – есеп беретін үкімет» формуласы өзгеріссіз қалғанын атап өтті. «Жұмыс тобының міндеті – парламенттік реформа бойынша ұсыныстар әзірлеу. Сол ұсыныстардың негізінде конституцияға енгізілетін түзетулер жобасы дайындалып, кейін республикалық референдумға шығарылады. Мемлекет басшысы атап өткендей, түптеп келгенде алдағы өзгерістер мен толықтырулардың ауқымы жаңа конституция қабылдағанмен бірдей»,-деді Мемлекеттік кеңесші.