Алматыда егеуқұйрық өріп жүр

Алматыда егеуқұйрық көбейіп кетті. Әсіресе қоқыс жәшіктерінің айналасында қаптаған кеміргіштер адамнан да қорықпайды дейді тұрғындар. Куәгерлер оларды видеоға түсіріп, әлеуметтік желілерге жүктеп жатыр. Зиянкестер тек көпқабатты үйлердің аулаларында емес, орталық көшелер мен саябақтарда, тіпті балалар алаңдарында да байқалған.

Кеміргіштердің көбейгенін қала билігі де растап отыр. Қазір мегаполисте залалсыздандыру жұмыстары жүріп жатыр. Мамандар әр үйді аралап, тұрғындарға кеміргіштерге қарсы у таратып жүр. Дезинфекция барлық 8 ауданды қамтиды дейді жауапты компания өкілдері.

Серікбай Ахметов, залалсыздандырушы компанияның маманы:

Қазан айының аяғына дейін аяқтаймыз. Дәл қазіргі уақытта біз Алатау ауданы, Жетісу, Медеуді аралап шықтық. Бәріне таратып жатырмыз. Жылына екі мәрте көктемде және күзде егеуқұйрық, тышқандарға қарсы осылай таратамыз. Мұның ешқандай тауыққа, адамға, итке, мысыққа зияны жоқ.