Жұмысшы мамандық: Абай облысында 200 грант бөлінді

Абай облысында жергілікті бюджет есебінен елімізге ең қажет мамандықтарға 200 білім гранты бөлінді. Экономика, техника, құрылыс, медицина мен ауыл шаруашылығы, сондай-ақ ІТ саласы бойынша сұранысқа ие 32 мамандық таңдалған. Облыс әкімі Семейде студенттермен арнайы кездесіп, грант иесі атанған жастарды құттықтады. Түрлі білім бәсекелерінде жүлдегер болған, жарыстарда ел және аймақ намысын қорғаған, ғылыми жобалармен айналысатын дарынды жастарға басымдық берілген. Биыл тұңғыш рет «Журналистика» және «Стоматология» мамандықтарына да грант қарастырылып, жаңа кадрларды даярлауға жол ашылды. Жергілікті бюджет есебінен білім грантын бөлуден еліміз бойынша Абай облысы көш бастап тұр.

Берік Уәли, облыс әкімі:

Өңірлерді аралаған кезде ең өзекті мәселе - кадр тапшылығына куә болып жүрмін. Құжат тапсырған мектеп түлектерінің жалпы саны 500-ден асты. Алайда біз оқу үлгерімі жақсы, балдары жоғары, пәндік олимпиадалар мен спорт жарыстарының жүлдегерлері болған, сонымен қатар аз қамтылған және көпбалалы отбасылардың, ауыл мектептерінің түлектеріне басымдық бере отырып, қажет мамандықтарға грант бөлдік.