Жақын арада Қазақстан мұнай өндірісін жылына 100 млн тоннаға жеткізеді

Жақын арада Қазақстан мұнай өндірісін жылына 100 млн тоннаға жеткізеді. Мұнай-газ саласының қызметкерлерін кәсіби мерекелерімен құттықтаған Мемлекет басшысы осылай деді. Жалпы, егемендік алғалы елдегі өндіріс 4 есе өскен. Қазіргі уақытта шикізатты терең өңдеуге баса мән беріліп отыр. Елдегі үш өңдеу зауыты жаңғыртылды. Соның арқасында ішкі нарық толық отандық жанар-жағармаймен қамтылып отыр. Келесі кезекте салаға жаңа технология мен жасанды интеллектіні енгізу міндеті тұр. Жалпы, көмірсутегі дүниежүзінің энергетика нарығында бұрынғыдай басты рөлге ие бола береді, деді Қасым-Жомарт Тоқаев.

Қасым-Жомарт Тоқаев, Қазақстан Республикасының Президенті:

Еліміздегі мұнай-газ өнеркәсібінің өзіндік дәстүрі, бай тарихы бар. Осы саланың қалыптасып, өркендеуіне бірнеше буын өкілдері зор еңбек сіңірді. Сіздерді аға буынның лайықты ізбасары деуге болады. Қазір мұнай-газ саласында екі жүз мыңнан астам адам жұмыс істейді. Сіздердің табанды еңбектеріңіздің арқасында Қазақстанымыз өркендеп, көркеюде. Мен мұны жоғары бағалаймын. Бәріңізге шынайы ризашылығымды білдіремін.