Жаңалықтарды Telegram арнамыздан оқыңыз!Семейде Қытай және Түрік компаниялары ауқымды инвестициялық жобаларды іске асырмақ. Түркия облыс орталығының инфрақұрылымын реттеуге қомақты қаржы бөліп жылдар бойы шешімін таппай келе жатқан мәселелер реттелмек. Мәселен, Ертіс арқылы өтетін көпір құрылысы, теміржол өткелдері салынады. Ал Қытай жағы шаһарда ірі әлеуметтік базар құрылысын бастап кетті.
Семейде бірнеше көшеде теміржол өткелдерін, жаяу жүргіншілер көпірін тұрғызу қажет. Семей, Курчатов және Аягөз қалаларында кәріз-тазарту нысандарын салу жоспарда. Облыс орталығында тұрмыстық қалдықтарға арналған полигон тұрғызып, аспалы көпірді қайта жаңғырту жүргізіледі. Облыс басшылығы аталған жобалардың іске асыру үшін түріктің «Makimsan» компаниясымен меморандумға қол қойды.
Корай Ахмет, компанияның атқарушы директоры:
Қазақстанда да бірқатар жобаларға қатыстық, ал Семей біз үшін ерекше маңызға ие өңір. Мұнда әртүрлі жобаға қатысуды қалаймыз. Біз инфрақұрылымдық жобаларға атсалысқымыз келеді. Өз тәжірибемізді енгізе отырып, пайдалы істер атқаруды көздеп отырмыз.
«Makimsan» компаниясы Түркияда және шетелде ірі құрылыс жобаларын жүзеге асырған. Халықаралық әуежайлар, жылу электр станциялары, автожолдар, тоннельдер мен көпірлер, метро және теміржол жүйелерін салған. Компанияның халықаралық жобаларының жалпы құны 2,5 млрд доллардан асады.
Берік Уәли, облыс әкімі:
Біздің облысқа көптеген инвесторлардан қызығушылық бар. Өйткені облысымызда көптеген табиғи ресурстарымыз бар. Соны игеруге инвесторлар қазіргі таңда өте қызығушылықпен қарап отыр. Географиялық жағдайда тоғыз жолдың торабында жолдың бойында инфрақұрылым, және барлық салада жұмыс жасауға біздің облысымыз өте қолайлы.
Ал Қытай инвесторлары облыс орталығында «Қазақстан – Қытай достық базары» құрылысын жүргізіп жатыр. Жоба шеңберінде заманауи сауда нүктелері, қоймалар, қонақ үй және автовокзал бой көтереді. 3 кезеңге бөлінген құрылыс жобасына 15 млрд теңге бөлінген.
Бейсен Сүйінбай, Xinyi LTD бас директоры:
Осы базардың негізгі мақсаты осы жергілікті бағаларды, бағаны тұрақты ұстау үшін және Қытайдан арзан тауарлар әкелуге біз жұмыс істейміз. Осы базарда үйге керек, тұрмысқа керек заттарды бір нүктеден алуға мүмкіндік ашылады. Және осы базардың ішінде автовокзал болады, яғни ол қасындағы ауыл, қала тұрғындарына осы Семейге келіп сауда жасауға мүмкіндік жасап береміз.
Құрылыстың алғашқы кезеңінде 2 мың, кешен пайдалануға берілгеннен кейін 5 мың адам жұмыс істемек. Нысан екі жылда қолданысқа беріледі.
Ержан Жақып
