Жаңалықтарды Telegram арнамыздан оқыңыз!Жеті қат жер астына түсіп, кен өндіретін кеншілер еліміздегі ең күрделі, әрі маңызды сала мамандары. Білектің күші мен темірдей төзімді талап ететін мамандықты екінің бірі таңдай бермейді. Ал қарағандылық Көкішевтер әулетінің 3 бірдей азаматы осы салада еңбек етуде.
Сырымбет Көкішевтің бала арманы басқа мамандық еді. Алайда алып қала кейіпкеріміздің ойын толықтай өзгертті. Сонау 1987 жылы Қарағандыға оқуға келіп, ақырында осы салаға аңсары ауған. Кейін отау құрып, шаңырақ көтерген. Осылайша кеншілер қаласында қателесуге болмайтын қос таңдауын қатар жасапты.
Сырымбет Көкішев, кенші:
Қорқыныш болған жоқ. Ауылда өскен соң қара жұмысқа ерте үйрендік. Жас кезде ондайды ойламайсың. Қазір екі ұлым да шахтада еңбек етеді. Екеуінің де жоғары білімі бар, бүгінде учаске басшысының орынбасарлары.
Бергісі 500-ден басталып, 800-ден асатын тереңдіктегі шахтаға 40 жыл ғұмырын арнаған Сырымбет Көкішевтің қосы ұлы да әке жолын жалғаған. Екеуі де қарапайым жерасты жұмысшысынан бастап, қысқа мерзімде басшылық қызметке көтерілген.
Фархат Кокушев, Рельстік көлік учаскесі бастығының орынбасары:
2017 жылы қарапайым жұмысшы болып еңбек жолымды бастадым. Кейін білімімді жетілдіріп, осы лауазымға тағайындалдым. Бала күнімізден шахта өмірін көріп, естіп өстік. Сондықтан мамандық таңдауда көп ойланбай, осы саланы таңдадық. Бүгінгі інім екеуміздің жетістігіміз – атамыз бен әкеміздің ақылының арқасы.
Фархат Көкішевтің нағашы атасы да кенші болған. Бүгінде туған інісі Дәулет те №2 өндіру учаскесі бастығының орынбасары. Ол учаскедегі техникалық, ұйымдастырушылық және кадрлық басқаруды қамтамасыз етеді. Атадан мал емес, мамандықты мұра еткен Көкішевтер әулеті бүгінде көпке үлгі.
Жасұлан Боранқұл, кенші:
Көкішевтер отбасын осы жерге қоныстанған кезден бастап танимын. Олар әулетімен абыройлы, жұмыс орнында өз атына кір келтірмей, еңбек етіп келеді. Ұлдары да әке жолын жалғастырып, еңбек етуде.
Өңірде Qarmet компаниясына қарасты 8 кен орнында 16 мың кенші жұмыс істейді. Олар жылына 9 млн тоннаға жуық көмір өндіреді. Қарағанды облысындағы Абай, Саран, Шахтинск, Қарағанды қалаларындағы жұрттың көбі осы шахталарда еңбек етеді. Мұның айқын дәлелі өңірде Көкішевтер әулеті сынды мыңдаған отбасылық династия бар.
Жандос Бақытұлы
