Жаңалықтарды Telegram арнамыздан оқыңыз!Қызылордада жаңа оқу маусымы қарсаңында екі бірдей «Келешек» мектеп есігін айқара ашты. Президент бастамасы аясында өңірде осымен 9 заманауи білім ордасы ел игілігіне беріліп отыр. Сыр өңіріне іс-сапармен келген Оқу-ағарту министрі Ғани Бисембаев ұстаздар мен балаларды құттықтап, көптің қуанышына ортақтасты.
Арай мөлтек ауданынан бой көтерген зәулім мектепте бір ауысымда 1500 оқушы білім алады. Бұрын бұл аумақтағы балалар қаладағы білім ошақтарына қатынап оқитын. «Келешек» мектебінің ашылуымен бұл мәселе шешімін тапты. Қазір барлық сыныптар оқушылармен толығып, оқу маусымына жүз пайыз әзір.
Ғани Бисембаев, Оқу-ағарту министрі:
1200 мектеп бой көтерген екен соңғы 6 жыл ішінде. Одан бөлек 4 мыңнан аса ауыл мектептері жаңғыртылды. Әлемдік пән олимпиадаларынан жүлделі орынмен қайтып жатқан балалардың саны соңғы 3 жылда үш есе көтерілгенін айтып өтуіміз керек.
Жаңа мектеп жанға жайлы. Мұнда оқушылар білім алып қана қоймай бойындағы шығармашылығын дамытуына мол мүмкіндік бар. Бейнелеу, еңбек, робототехника сыныптары соңғы үлгідегі құралдармен жабдықталған. Балалары үшін ата-аналар да айрықша қуанышты.
Айнагүл Ахметова, Қызылорда тұрғыны:
Қуаныштымыз. Мынау балдарымызды әр мектепке тасып, автобустан қалып. Енді мінекей мектеп ашылғанына қауанып жатырмыз. Рақмет, мынау жаңа мектеп салып, ғимаратты салып бергендеріне.
Сондай-ақ осы күні қаланың шет аумағында 600 орындық «Келешек» мектеп ел игілігіне берілді. Халық санының өсу динамикасы жоғары Әл-Фараби мөлтек ауданы мен Қызылжарма елді мекенінің балалары жаңа оқу маусымында еңселі білім ошағына баратын болады.
Әділбек Серікұлы
