Президент ЖИ дамыту жөнінде кеңес өткізді

«Үкімет жеке деректерді қолданатын барлық коммуникацияны ұлттық мессенджерге көшіру мәселесін пысықтауы керек». Жасанды интеллектті дамыту мәселелері жөнінде кеңесте Президент Қасым-Жомарт Тоқаев осылай деді. Әрі үлгі ретінде отандық Aitu мессенджерін ұсынды. «Ол тиісті қауіпсіздік деңгейін қамтамасыз ете алады», - деді.

Мемлекет басшысы жыл басынан бері деректердің қолды болуына байланысты 40-тан астам факті тіркелгенін де айтты. Мұндай инциденттер құзыреттердің дұрыс бөлінбеуі мен шашыраңқылығы салдарынан болып жатқанын атап өтті.

Қасым-Жомарт Тоқаев, Қазақстан Республикасының Президенті:

Киберқауіпсіздік – ұлттық маңызы бар басымдық. Бұл салада кімнің неге жауапты екені нақты көрсетілген бірыңғай басқару жүйесі және заманауи база болуы тиіс. Осы орайда Президент Әкімшілігіне Қауіпсіздік кеңесімен бірлесіп, 1 ай ішінде ақпараттық қауіпсіздік саласындағы міндеттер мен өкілеттіктерді қайта бөлу туралы ұсыныстар енгізуді тапсырамын.

Данияр Қайыртай