Жаңалықтарды Telegram арнамыздан оқыңыз!Бүгін мемлекеттік білім беру грант иегерлерінің тізімін жариялады. Конкурсқа 113 мыңға жуық талапкер құжат тапсырған.
Армандар орындалған күн. Жас түлектердің тағатын тауысқан ең маңызды сәт – білім беру гранттарының нәтижесі жарияланды. Тізімде Солтүстік Қазақстандық түлек Мәдинаның да есімі бар. 11 жыл біліп алып, тағы 11 ай ҰБТ-ға жатпай-тұрмай дайындалған талапкердің еңбегі ал ата-анасының үміті ақталды. Енді ол Астанада әлеуметтанушы мамандығын меңгеруді көздейді.
Бүгін Мәдина сияқты еліміздің түкпір-түкпірінен мыңдаған талапкер мемлекеттік грант арқылы жоғары білім алу мүмкіндігіне ие болды. Бір ғана «Серпін» бағдарламасы бойынша 2 мыңнан астам жас тегін білім алады.
Биыл еліміз бойынша 216 мың бала мектеп бітірген. Оның 78 мыңы грантқа қол жеткізді.
Саясат Нұрбек, ҚР Ғылым және жоғары білім министрі:
Сүйінші жаңалық, биылғы «Жұмысшы мамандықтар жылында» 60 пайыздан астам алынған гранттар инженерлік-техникалық мамандықтарға берілген. Топ-3 бағыттар ол: педагогика – 13 мың грант, ақпараттық технологиялар және ЖИ – 11 мың грант, бірақ ең үлкен инженерлік бағытта – 18 мыңнан астам грант бөлінді. Осы жылдан бастап біз сирек мамандықтарға ветеринария, энергетика, су шаруалығы саласында өңірлік квоталар енгіздік.
Бұл дегеніміз – әр өңірдің экономикасына керек, әрі тапшы мамандықтарға басымдық беріледі. Айта кету керек, гранттарды бөлу кезінде әлеуметтік осал топтарға жататын балалар үшін заңнамада белгіленген квоталар сақталады. Сондай-ақ дарынды жастарды қолдау мақсатында конкурссыз берілетін гранттар қарастырылған, олар – халықаралық олимпиадалар мен спорттық жарыстардың жеңімпаздарына бұйырады.
Нұрсұлтан Тілектес, тілші:
Алғаш рет мерзімді әскери қызметін өтеп жатқан азаматтар үшін де 2 мыңнан астам грант бөлінді. Сарбаздар Отан алдындағы борышын өтеп келген соң тегін жоғары білім алуға мүмкіндігіне ие болады. Ал шекті балл жинай алмағандар немесе бейіндік пәндерін ауыстыратын түлектер тамыздың 10-ы мен 14-і аралығында ақылы түрде қайта ҰБТ тапсыра алады. Айта кету керек, биыл жоғары оқу орындарына құжат тапсыру 25 тамызға дейін жалғасады.
Нұрсұлтан Тілектес
