Еліміз бойынша 2119 күдіктіге электронды білезік тағылған

Биылы алты айда 2119 күдіктіге электронды білезік тағылып, бақылауға алынған.

Яғни, тергеу амалдары жүріп жатқан кезде күдіктілер бұрынғыдай қамауда болмайды. Құзырлы органдар оларды үйқамақта да бақылауда ұстайды. Былтырдан бастап қолданысқа енген жоба Қызылорда облысында сәтті жүзеге асуда. Жыл басынан бері өңірде 253 күдіктіге электронды белезік тағылған.

Ғалым Шыңғысов, мамандандырылған тергеу сотының төрағасы:

Электронды мониторинг жүйесін қолдану мемлекет үшін шығыны аз, сонымен бірге қамауға алуға қарағанда, әлдеқайда тиімді әрі адамгершілікке сай болып табылады. Бұл ретте күдіктілер күнделікті өмір салтын, әлеуметтік байланыстарын және жұмыс орнын сақтай алады.

Осыдан төрт жыл бұрын электрондық бақылау құралдарын қолдану көрсеткіші 3%-дан аспайтын еді, былтыр үй қамаққа алынған күдіктілердің 60%-на білезік тағылған.

Мейірбек Даубалаев, облыстық адвокаттар алқасының төрағасы:

Қазіргі таңда соттардың үйқамағын көптеп қолданып, электронды құралдарды қолдаудың арқасында тергеудің де заңсыз тәсілдеріне тосқауыл қойылып отыр деп есептейміз.

Қозы Көрпеш Жасаралұлы