Атырауда бассейн басшысы үйқамаққа алынды

Атырауда адамдар жаппай уланып қалған жекеменшік бассейннің басшысы үйқамаққа алынды. Естеріңізге салайық, 13 шілде күні Атыраудағы акваорталықтағы бассейнде 13 бала мен 2 ересек адам уланып, ауруханаға түсті. Медициналық көмек алған 10 баланың жағдайы жақсарған соң, дәрігерлер оларды үйлеріне жіберді. Ал 3 бала жансақтау бөліміне жатқызылып, бірнеше күн дәрігерлердің бақылауында болды. Алдын ала болжам бойынша, құрамында хлоры бар заттарды мөлшерден тыс қолданған. Бассейн иелері су тазарту жүйесінде ақау болғанын мойындаған. Осы оқиғадан кейін нысан жабылып, Төтенше жағдайлар департаменті мен прокуратура тексерісті бастады. Тергеу ісі аяқталғанға дейін акваорталық басшысы үйқамақта болады.

Нұрсұлтан Нұрсейіт