Шығыс Қазақстандағы Топқайың ауылына биыл ауызсу беріледі

Шығыстағы Топқайың ауылына биыл қараша айына дейін ауызсу беріледі. Бүгінге дейін елді мекенге құбыр толық тартылды. Енді қосымша ұңғыма қазып, су мұнарасы салынады. Жалпы, бұл елді мекенді орталық су жүйесіне қосу үшін 4 жыл бұрын республикалық бюджеттен 600 миллионға жуық теңге бөлінген. Алайда жауапсыз мердігер, бастаған ісін аяқсыз қалдырған. Салдарынан Топқайың ауылының малы да, жаны да қазір суды өзеннен ішіп отыр. Дегенмен биыл басталған істі аяқтау үшін жұмысқа басқа мердігер тартылды. Қосымша 78 миллион теңге бөлінді. Ауыл ішінде бұрын қазылған шұңқырлар, құдықтар жабылды. Бүгінге дейін істелген жұмысты облыс әкімі өзі арнайы барып көріп, жауапты басқарма басшылары мен мердігерге нақты тапсырма жүктеді.

Олжас Керейхан