«Уақыт» көрмесі: 40-қа жуық туынды қойылған

Елордада қылқалам шебері Ахмет Ахаттың «Уақыт» атты көрмесі өтіп жатыр. Шара Қазақстан халқы Ассамблеясының 30 жылдығы аясында ұйымдастырылған. Көрмеде 40-қа жуық туынды қойылған. Оның әрқайсысы түркі халықтарының шежіресімен, ертегі, әдебиетімен тікелей байланысты. Бір ерекшелігі, автордың 70 жылдық мерейтойы да дәл осы айтулы оқиғамен тұспа-тұс келген. Ұйымдастырушылардың айтуынша, Ахмет Ахаттың шығармашылығына қызығатын халық көп. Әсіресе, жастардың тарихи туындыларға деген ықыласы ерекше. Көрме 4-тамызға дейін жалғасады.

Жанна Енсебаева, Өнер галереясының директоры:

Ахмет Ахатпен бірлесе жұмыс істеп келе жатқанымызға 19 жылдан асты. Осы уақыт ішінде Еуропаның көптеген елінде көрме өткіздік. Ондағы мақсатымыз – еліміздің сурет өнерін өзгелерге таныту, таныстыру. Автордың «Күлтегінге», Жібек жолы бойындағы көне қалаларға арналған туындылары тіпті шетелдіктерді де бей-жай қалдырмайды. Осы қарқынмен әлі де жұмыс істей беруге ниеттіміз.

Ақниет Балтанова