Сенат пен Мәжілістің бірлескен отырысы өтіп жатыр

Бүгін қос палата депутаттары кешікпей келді. Отырыс белгіленген уақытта басталып кетті. Бүгін Жоғары аудиторлық палатасының 2024 жылғы республикалық бюджеттің игерілу туралы есебі тыңдалады. Сондай-ақ ұлттық мақсаттар мен міндеттердің іске асырылуын мониторингілеу жөніндегі парламенттік комиссияның құрамы нақтыланады. Бұған дейін Мәжіліс пен Сенат үшінші сессияны қорытындылаған еді. Үшінші сессия барысында Мәжіліс 39 жалпы отырыс өткізіп, 90 заңды қабылдаған. Одан бөлек, 39 халықаралық келісім бекітіліп, мемлекеттік органдардың басшыларына 461 депутаттық сауал жолданған. Депутаттар азаматтардың жеке өтініштері бойынша 2 мыңнан астам қабылдау өткізген. Ал Сенатта 89 заң қаралды. Оның 75-і мақұлданып, 14-і Мәжіліске қайтарылды. Қабылданған маңызды құжаттардың ішінде Бюджет және Салық кодекстері, жаңа Су кодексі су ресурстарын тиімді пайдалану туралы және МӘМС-ке қатысты заң жобалары бар. Сондай-ақ Түркістан қаласына ерекше мәртебе беретін заң да мақұлданды.

Нұрсұлтан Тілектес