Қарқара жайлауында «Қымызмұрындық» фестивалі өтті

Алматы облысында дүбірлі той. Тарихи құндылығымен ерекше әйгілі Қарқара жайлауында «Қымыз фестивалі» өтіп жатыр. Шараға еліміздің әр түкпірінен 5 мыңға жуық адам келді. Кең дала төсіне жиналған халықтың көңіл-күйін әріптесім Айдана Қуантхан жеткізеді.

Айдана Қуантхан, тілші:

Бұл тек табиғатымен емес, тарихымен де ұлт жадында сақталған - Қарқара жайлауы. Дүбірлі тойда жайлау жасыл кілемге оранып, көк аспанмен тілдескен шыңдар әсем әнмен тербеліп жатыр. Бүгінгі шараға 100-ге жуық киіз тігіліпті. Себебі, табиғат пен тарих тоғысқан мекенге алыс-жақыннан келушілер көп.

Рамазан Стамғазиев, Қазақстанның Еңбек сіңірген әртісі:

Бұл жерде де Қарқара жәрмеңкесі өткен. Ұлы жібек жолы өткен жерлер, жан-жағымыз шекаралас ел болғаннан кейін осы жерде сауда-саттық жүрген. Шарттардың өзі осы Қарқарада отырып жасалған. Қасиетті шөбі де, асқар таулары да тұнып тұрған керемет елді мекен.

Ал мұнда ауылдың қыз-келіншектері күбіде қымыз пісіп жатыр. 1 тонна қымыз тегін таратылды. Ұлттық сусын қымыздың түр-түрі бар. Дәмі тіл үйіреді.

Айдана Қуантхан, тілші:

Дала төсіндегі дүбірлі той спорттық жарыстармен жалғасты. Жеңімпаздарға ақшалай сыйлықтар берілді. Келушілерге арнап жасақталған көрмеден де құнды жәдігерлерімізді кездестіре аласыз. Қызығы ерекше есте қалған думанды той салт-дәстүрімізді өркендетуге бағытталып отыр.

Айдана Қуантхан