Қытайдың оңтүстігінде жауын құйып, бірқатар провинцияларды су басты

Қытайдың оңтүстігінде төпелеп жауған жаңбыр соңы алапат тасқынға ұласты. Әсіресе, Гуаньси-Чжуан автономиялық ауданындағы жағдай қиын. Сонымен қатар, Хунань мен Хубэй провинцияларында да адамдарды эвакуациялауға тура келген. Талай елдімекен мен қалалардың көшелері өзенге айналды. Егістік алқаптары шайылып, кейбір жерлерде лай көшкен.

Метеорологтардың хабарлауынша, су апатының күшеюіне муссон жауындары маусымының ерте басталуы себепші. Әзірге құрбандар туралы мәлімет түскен жоқ.

«Синьхуа» агенттігінің хабарлауынша, қауіптің қызыл түсі Аньхой, Хэнань, Гуйчжоу провинцияларында да жарияланып, жергілікті халыққа сақ болу ескертілді.

Арыстан Рысбек