Жаңалықтарды Telegram арнамыздан оқыңыз!Ақтөбе облысында он жасар бала саябақ аумағында тоққа түсіп қалды. Қазір жағдайы ауыр. Оған облыс орталығындағы білікті дәрігерлер көмек көрсетіп жатыр.
Жақсыбек Кемал, тілші:
Оқушы ойнап жүріп, саябақ қоршауында орналасқан жарықшамға өрмелеп шыққан. Сол сәтте тоқ ұрған. Дәрігерлердің кеңесуінен кейін бала облыстық ауруханаға шұғыл жеткізілді.
Қуантай Қапарұлы, травматолог-дәрігер:
Электрожарақат алған. Күйген жерлері бар. Соған байланысты түскен кезде жағдайы ауыр болған. Шок жағдайында. Қазір емнің арқасында өзіне келді.
Жақсыбек Кемал, тілші:
Бұл шағын саябақ Жеңіс күні қарсаңында мамыр айында ғана ашылған. Полиция оқиға орнын тексеріп, ашық қалған тоқ көзін таппаған. Қазір сол маңдағы барлық электр жүйелері тексеріліп жатыр. Сараптама жұмыстары жүргізіледі. Егер құрылысты жүргізген мекеменің кінәсі дәлелденсе, жауапкершілікке тартылуы мүмкін.
Мамыр айында екі өңірде, Қапшағайда 11 жасар баланы, ал Оралда 9 жасар жасөспірімді тоқ соғып, қайтыс болған еді.
Жақсыбек Кемал
