М.Әшімбаев: Өзекті проблемаларды өнер арқылы көтеру – үлкен шеберлік

Өнер арқылы өзекті проблемаларды, қоғамды толғандырған түйткілдерді қозғап, оларды шешудің стандарттан тыс жолдарын ұсыну үлкен шеберлік. Және бұл қазір елімізге аса қажет бағыттардың бірі. OzgeEpic креативті хабына барған Сенат төрағасы Мәулен Әшімбаев осылай деді. Мұнда театр қойылымдарын, музыкалық және поэзиялық кештер мен көрмелер өткізуге арналған кеңістік қарастырылған. Этно-мұражай мен қолөнер шеберханасы да бар. Сенат депутаттарына Астанада бірнеше театрдың актерлері мен шығармашыл зиялы қауым өкілдері «Құштар» атты қойылым көрсетті. Өнерпаздар спектакль арқылы аутизмге және оның әлеуметтік аспектілеріне терең үңіліп, мәселеге қоғамның назарын аудартады.

Мәулен Әшімбаев, ҚР Парламенті Сенатының төрағасы:

Осындай өзгеше, аутист балаларға, мүгедектігі бар балаларға үйрету керек, айту керек. Оқуына мүмкіндік ашу керек. Ары қарай жұмыс істеуге жол ашып беру керек. Қоғамға сіңіп кетуге мүмкіндіктер жасауымыз керек. Мемлекеттің тарапынан біраз нәрселер жасалып жатыр. Бірақ қоғамда да біз көзқарасты ұстанымды өзгертуіміз керек.

Оңғар Алпысбайұлы