Қарағанды облысының Шет ауданында жол сапасы нашарлап кеткен

Қарағанды облысы Шет ауданында тұрғындар жол сапасына наразы. Айтуларынша, аудан ішінде бірқатар жолдар сын көтермейді. Мысалы, Ағадыр кентіне баратын жолға жылда жөндеу жұмыстары жүргізілгенімен нәтиже жоқ дейді.

Ақсу-аюлы кентімен Ағадыр кентінің арасы 90 шақырым. Жолдың біршама бөлігі жөнделгенімен, аудан орталығына жақын 20 шақырым тас жолдың жағдайы нашар. Жауаптылар жыл сайын миллиондап қаржы құйса да ой-шұңқыры бітер емес дейді тұрғындар.

Сауалнама:

- Осылай ғой, міні жылда жамай береді. Жүре алмаймыз. Неге жамай береді? Сапасы жоқ. Жақсы қылып жасаса ғой. Жоқ. Ақшаны босқа шашып.

- Осы жерден Шетке дейін жол осындай. Екі рет жүрсең, машина шашылып қалады. Жылда жамай береді. Білмеймін.

Қырық жамауға айналған 20 шақырым жол биыл да тегістеліп жатыр. Ал ақ жағалылар толыққанды жөндеуді кейін жасаймыз деп ақталды. Себебі биыл Ақсу-аюлы мен Сәкен Сейфуллин ауылы арасындағы тас жол жөндеуден өтпек.

Мұхит Мұхтаров, Шет ауданының әкімі:

Биылғы жылы облыстық басқарма тарапынан 2 миллиард 800 миллион қаржы бөлініп, 15 шақырымды жөндеу қарастырылып отыр. Жалпы 26 шақырым жол 2 жылда жөнделеді. Ал Ағадыр жақтағы жолға ағымдағы тегістеу жүргізіледі.

Жандос Бақытұлы