ЕуроОдақ Сирияға салынған санкцияларды алып тастамақ

ЕуроОдақ Сирияға салынған санкциялардың күшін жоюға келісті. «Елде жұмыс орындары ашылып, тұрақтылық орнауы маңызды» деп мәлімдеді блоктың Сыртқы саясат жөніндегі жоғарғы өкілі Кая Каллас. Осылайша Сирия банктерін әлемдік қаржы жүйесінен ажыратқан және Орталық банктің активтерін бұғаттаған шектеулер алынып тасталуға тиіс. Бұған дейін ақпанда ЕуроОдақ Сириядан мұнай, газ, электр қуаты тасымалына, көлік саласына қатысты санкциялардың күшін жойған еді.

Кая Каллас, ЕуроОдақтың сыртқы саясат жөніндегі жоғарғы өкілі:

Министрлер Сирияға қатысты барлық экономикалық санкцияны алып тастауға келісті. Ал Асад режимі мен адам құқықтарын бұзуға қатысты шектеулер күшінде қалады. Экономикалық оңалусыз бейбітшілікке қол жеткізу мүмкін емес. Бәрімізге керегі Сирияның тұрақтылығы. Мұнда қазір бәрі мінсіз бе? Жоқ, олай емесі анық. Бірақ Сирия халқына мүмкіндік беруіміз керек деп ойлаймын.

Арай Төлегенқызы