Аралдықтар көптен күткен аспалы көпір ашылды

Қызылорда облысы Арал ауданында темір жол үстінен өтетін аспалы көпір ел игілігіне берілді. Бұл теңізді өлке тұрғындарының көптен күткен қуанышы.

Арал қаласында бүгінде 40 мыңға жуық халық тұрады. Елді мекенді екіге бөліп тұрған шойын жол арқылы қатынас осы кезге дейін тұрғындарға қауіп туғызып келді. Ал пойыз өткенде өткел жабылып, ұзын-сонар көлік кептелісі қалыптасатын. Енді міне, көптің талап-тілегімен ұзындығы 940 метрді құрайтын жаңа көпір салынып, өзекті мәселе шешімін тапты.

Байнияз Тілепов, аудан тұрғыны:

Осы Арал халқының көптен күткен жұмысы. Өйткені, мектеп оқушылары, автокөлік жүргізушілері мына пойыздың кедергісінен көп кедергі көрді. Сондықтан, мына көпірдің халық үшін, жүргіншілер үшін, оқушылар үшін үлкен пайдасы бар.

Әділбек Серікұлы