Жаңалықтарды Telegram арнамыздан оқыңыз!Эстониядағы қазақтар ұлттың рухани мұрасын сақтауға барын салмақ. Жерлестеріміз 2021 жылы Таллинде қазақ тілі мен мәдениеті үйірмесін ашқан. Мақсат осы елде оқу, жұмыс бабымен тұрып жатқан қазақстандықтардың балаларына қазақы тәрбие беру. Жыл өткен сайын үйірменің жұмысына балғындардың қызығушылығы артуда.
Қара көзі мөлдіреп, тұлымшағы желбіреген балақайлардың ең кішкентайы бесте, үлкені тоғызда. Бірі Эстонияда дүниеге келген. Енді бірі ата-анасының жұмыс бабына байланысты біраз жылдан бері осында тұрып жатыр. «Жат жердегі жеткіншектер ана тілін ұмытпасын, тамырынан ажырамасын» деп үйірмені жерлесіміз Альбина Нұрпейісова ашқан. Балалардың санасына халқымыздың рухани байлығын сіңіру Сара Мәдиеваға сеніп тапсырылыпты.
Сара Мәдиева, Эстониядағы қазақ тілі мен мәдениеті үйірмесінің мұғалімі:
Балаларға сабақ аптасына бір рет өтеді. Балалар үлкен қызығушылықпен келеді. Өйткені, сабақта өздері сияқты қазақ балаларымен танысады, дос болады. Сабақ қызықты өту үшін бірге ойындар ұйымдастырамыз. Қазақ әнін тыңдап, қазақша мульфильмдер көреміз.Балғындар өз тілін, тарихын, әдет-ғұрпын білуге құштар. Олар осы курстың арқасында ойларын да еркін жеткізуге машықтанған.
Аниса Нығмет, 5-сынып оқушысы:
Мен үйде қазақ тілінде сөйлеймін. Мен мына жерде соңғы рет билеген кезде бірінші орынды алдым. Мен би үйірмесіне барып жүрмін. Менде қазақ достарым көп, бірақ кейбірлері білмеген соң үйретемін. Басқа достарым бар, Қазақстаннан емес, оларға да үйретем. Олар да қазақ тіл білгісі келеді.
Балғындар курста қазақ тілін үйреніп қана қоймай, мәдениетімен тереңірек танысады. Бүгінгі сабақта олар Наурыз мейрамы жайлы мол мағлұмат алып, наурыз көже жасауды үйренді. Артынша, асық атудан өзара сайысқа түсті. Ұлт жанашырлары болашақта Эстонияда қазақ тілді ортаны кеңейтіп, балаларға арналған жобаларды көбейтпек.
Нұрсұлу Қасым
