Жаңалықтарды Telegram арнамыздан оқыңыз!Қызылорда облысында шаруалар көктемгі дала жұмыстарына білек сыбана кірісті. Биыл аймақ диқандары 193 мың гектар жерге дәнді дақыл егуді жоспарлап отыр. Соның 86 мың гектары күріш. Бүгінде егін алқабындағы қауырт тірлікті Әділбек Серікұлы көріп қайтты.
Көктем келгелі ауылшаруашылығы техникалары тыным таппай, жер жыртып, қазір егіс даласының шаңы шығып жатыр. Диқандар ерте көктемде егілетін мақсары, жаздық бидай мен жоңышқа тұқымын сеуіп қойған. Ал күріштік жерлердің бабы мүлдем бөлек. Шаруалар соңғы жылдары ғарыштық технологиямен атыздарды тегістеп, егін шаруашылығын ғылыммен ұштастырып келеді.
Данабек Әбдібеков, шаруа қожалығының төрағасы:
Лазер Мара дейді. Қазір кейінгі шыққан заманауи техника ғой. Сонымен тегістеп жатырмыз. Біз енді 3-4 шаруа қожалық бірігіп, бірлесіп жұмыс істеп жатырмыз. Күрішке 350 гектардай межелеп жатырмыз.
Күзде қырмандар дәнге толса, көктемде мұнда қап-қап тыңайтқыш жиналады.
Әділбек Серікұлы, тілші:
Сыр диқандары егін маусымында 140 мың тоннадай минералды тыңайтқыш пайдаланады. Егіннің бітік шығуы құнарлы биоминералға тікелей байланысты. Сондықтан шаруашылықтар ерте көктемнен тыңайтқыш қорын жинақтап алуда.
Енді жердің құнарын арттыратын аммониумсульфат тыңайтқышы өңірде өндіріледі, диқандар шет елден тасып әуре болмайды. Мұнан бөлек, жергілікті ғалымдар мал азығы үшін түйе жоңышқа тұқымы мен арпаның жаңа сорттарын шығарды. Және де тез өсетін Сыр сұлуы күрішін көптеп егуді ұсынып отыр.
Жанұзақ Байманов, Ы.Жақаев атындағы Қазақ күріш шаруашылығы ҒЗИ төрағасының орынбасары:
Сыр сұлуы күрішін біз ұсынып отырмыз. Мұның ерекшелігі вегетациялық кезеңі басқа күріштерге қарағанда 10-15 күнге тез піседі. Және оның шығымдылығы да 62 пайыздан жоғарыға дейін болады. Өңделген Сыр сұлуы күрішінің базардағы бағасы 20-30 теңгеге қымбат.
Биылғы егін маусымында аймақта қант құмайы егісінің көлемі артпақ. Сондай-ақ азық-түлік сұранысына сәйкес 17 мың гектарға көкөніс пен бақша дақылдары егіледі.
Әділбек Серікұлы
