Жаңалықтарды Telegram арнамыздан оқыңыз!«Балиға барамыз деп, бәлеге жолықтық!» Еліміз бойынша шетелге барып демаламыз деген жетпіске жуық адам алаяқтардың құрбаны болғанын айтады. Олар авторлық турлар ұйымдастыратын оралдық 23 жастағы қызға 200 мыңнан бір миллион теңгеге дейін ақша аударған.
Ақтөбе қаласының өзінде оншақты адам екі айдан бері қаржыларын қайтара алмай жүр. Олар тур ұйымдастырумен айналысатын кәсіпкердің қызметін алдын ала зерттегендерін, ол кезде күмәнді ештеңе болмағанын айтады. Келісім бойынша, алдымен Алматы қаласына барып, билетті сол жерден алулары тиіс болған.
Мира Қожаева, Ақтөбе тұрғыны:
Билет те жоқ, самолет те жоқ, сонымен қалдық Алматыда. 25-і күні біз арыз жаздық, сол әуежайдың ішіндегі милицияға. Оны түсіріп жіберіп жатырмыз оған. Кешіріңіздер, ақшаңызды жіберемін деп, осы екі ай бойы сол сөз естіп келе жатқанымыз.
Қазір республика бойынша алданған жетпіске жуық адам бір бірімен байланысып отыр. Дегенмен алаяқтық құрбандарының саны одан да көп болуы мүмкін. Белгілісі, кәсіпкердің өзі қазір шетелде. Қызығы, қызметін әлі күнге дейін жалғастырып жүр. Агенттік оның інісінің атына жазылған. Бұған дейін алаяқтық дерегі бойынша Алматы және Ақтөбе қалаларының Ішкі істер органдарына арыз түскен.
Ерболат Сарқұлов, Ақтөбе облыстық ПД баспасөз қызметінің жетекшісі:
Қазіргі таңда екі немесе одан да көп адамға қатысты алаяқтық жасау дерегі бойынша туристік агенттік иесіне қылмыстық іс қозғалды. Жәбірленуші ретінде 3 отбасы өтіп жатыр. Қазіргі уақытта күдіктінің жеке басы анықталды. Оны ұстауға бағытталған іс-шаралар жүргізілуде.
Жақсыбек Кемал
