Жаңалықтарды Telegram арнамыздан оқыңыз!Папилломаға қарсы екпе егудің екінші кезеңі басталды. Вакцина 11-15 жас аралығындағы қыздарға салынады. Талапқа сәйкес, екпені егу екі кезеңнен тұрады. Яғни, алғашқы дозаны алғандар 6 айдан кейін екіншісін қабылдайды. Бірінші кезеңде вакцина 130 мыңға жуық қыз балаға салынған. Екпе жатыр мойны обырының алдын алады. Елімізде дәл осы дерт әйелдар арасында дендеп тұр. Онкологиялық ауру ішінде сүт безінің қатерлі ісігі 1-орында болса, жатыр мойны екінші орында тұр. Оның негізгі қоздырғышы папиллома вирусы екені ғылыммен дәлелденген. Екпе тек ата-ана рұқсатымен ерікті түрде салынады. Ал папиллома вирусы адамдарға қандай жолмен жұғатынын мамандар былай түсіндірді.
Манар Смағұл, ҚР ДСМ Ұлттық қоғамдық денсаулық сақтау орталығы басқарма төрағасының орынбасары:
Алдымен - тығыз қарым-қатынас. Біріншіден, жыныстық жол арқылы жұғады. Екіншіден, бассейнге, саунаға барғанда, терімен-теріде қатынас болса, оның жұғуы жоғары. Ал статистикаға қайтадан жүгінсек, 22-23 жасқа дейін 80 пайыз адамда бұл вирус ағзада болады.
Папилломаға қарсы екпе ұл балаларға да салынуы мүмкін
Манар Смағұлдың айтуынша, елімізде папилломаға қарсы екпені ұлдарға да салу жоспарда бар. Себебі ер балалар да вирусты тасымалдаушы болуы мүмкін. Бірақ жоспардың нақты қашан жүзеге асатыны белгісіз. Бүгінде 76 мемлекетте папилломаға қарсы вакцина қыздармен қатар ұлдарға да егіледі.
Самал Қабышева
