Жаңалықтарды Telegram арнамыздан оқыңыз!Бүкіләлемдік аутизм туралы ақпарат тарату күніне орай Ұлттық балаларды оңалту орталығы флешмоб ұйымдастырды. Шараға педагогтер, невролог-дәрігерлер, менталды ауытқуы бар балалар мен олардың ата-аналары қатысты. Мамандар аутизм туралы ақпарат айтты.
Балалар қолын көк бояуға малып, арнайы плакатқа алақан ізін қалдырды. Өйткені көк түсті алақан - аутизмі бар адамдарды қолдаудың халықаралық белгісіне айналған. Жиында мамандар аутизмді диагностикалау мен емдеудің заманауи тәсілдері туралы ақпараттармен бөлісті. Сондай-ақ 7 сәуірге дейін орталықта ерекше балаларға арналған тегін диагностика ұйымдастырылатынын айтты.
Зүлфия Жансейітова, Ұлттық балаларды оңалту орталығының бөлім меңгерушісі:
4 сәуірде тікелей эфирге шығамыз. Ата-аналарды мазалаған сұрақтар болса, қай өңірден екеніне қарамастан жауап береміз. Дәрігерлеріміз онлайн консультация жүргізеді. Ал 7 сәуірге дейін Астана қаласында болса, келіп, тегін қаралуға мүмкіндік жасап отырмыз. Тіпті әлі диагнозы қойылмаған, бірақ аутизм қауіпі бар балаларды да мамандарымыз қарап, нақты шешімін айтады. Айналдырған 1 жыл ішінде орталықта 250 балаға аутизм диагнозы қойылды.
Айназ Қазбекова, Ұлттық балаларды оңалту орталығының түзету-әдістемелік бөлімінің психолог маманы:
Егер бала 1 жасқа дейін өзінің есіміне қарамаса, көзге тік қарамаса, балалармен ойнамаса, ойыншықтарды қатарға тізіп ойнайтын болса, міндетті түрде неврапотолог мамандарының көмегіне жүгінуіміз керек. Егер бала 2 немесе 3 жаста, осы белгілерді біле тұра, ешқандай маманның көмегіне жүгінбесе, онда дамуы кешеуілдейді. Сондықтан біз қазір ата-аналарға қазір үндеу жасап жатырмыз.
Ақниет Балтанова
