Жаңалықтарды Telegram арнамыздан оқыңыз!Ақтөбеде ректордың бұйрығымен оқудан шығарылған Халықаралық қазақ-орыс университетінің 350 студентінің мәселесі шешілді. Өңірге Ғылым және жоғары білім министрлігінің өкілі арнайы барып, оқу орнына қатысты бірнеше заңсыздықтың анықталғанын мәлімдеді.
Күні кеше білім ордасының 350 студенті бір мезетте оқудан шығарылғанын айтып шағымданған еді. Университет басшылығы олардың жүзге жуығы оқу ақысын төлемегенін, басқалары 40 сағаттан артық сабаққа қатыспағанын алға тартты. Дегенмен министрлік өкілі ректордың бұйрығы заңсыз екенін, оның үстіне ережеге сай Мемлекеттік тілде жазылмағанын айтты. Одан бөлек, білім алушылардың студент екенін растайтын статусы арнайы базада өзгермеген. Министрліктің араласуынан кейін студенттердің барлығына оқу жылын аяқтауға мүмкіндік беріліп отыр. Дегенмен білім алушылар оқу ақысын толықтай төлеуі керек.
Ақерке Абылайхан, ҚР Ғылым және жоғары білім министрлігі комитет төрағасының орынбасары:
Студенттердің түсініктемелері қазіргі таңда қолымда тұр. Яғни, әркімнің өзінің себебі бар, түсіндірген. Бірақ сабаққа келеміз, қатысамыз деп отыр. Оқу жылын аяқтап, басқа университеттерге ауысуға талаптарға сәйкес жағдайда мүмкіндік берілетін болды. Ең бастысы қазір студенттердің мәртебесі сақтаулы.
Жақсыбек Кемал
