Жаңалықтарды Telegram арнамыздан оқыңыз!Елімізде кешелі бері 1-сыныпқа құжат қабылдау қарқынды жүріп жатыр. Оқу-ағарту министрлігі биыл 370 мыңнан астам оқушы мектеп табалдырығын аттайды деп болжап отыр. 1 күн ішінде 7 жарым мыңнан аса өтініш қабылданып үлгерді. Ең кішкентай әлем чемпионы да биыл мектепке қадам баспақ. Абдул-Мәлік Қайрат жуырда ғана шахматтан чемпион атанып келген еді. Кішкентай жеңімпазбен тілшіміз тілдесіп қайтты.
Абдул-Мәлік Қайрат – шахматтан әлем чемпионы. Ол жуырда Сербияда өткен чемпионатта Үндістандық басты қарсыласын жеңді. Бұл сайысқа әлемнің 44 елінен 470 шахматшы қатысып, бақ сынады.
Абдул-Мәлік Қайрат, шахматтан әлем чемпионы:
Мен 4 жасымнан шахматпен айналысам. Ойын оңай болған жоқ. Бірақ арманым көп. Гарри Каспаров, Максим Искаков, Гукеш Доммараджу әлем чемпионы атанған вундеркиндтер. Осылар сияқты үздік болғым келеді. Гроссмейстер атағына жетсем деймін.
Жас жеткіншекті шахмат клубына атасы 3 жылдан бері апарады. Бастапқыда шахмат фигураларына қызығудан бастаған Абдул-Мәлік бүгінде аптасына 4 рет 4-5 сағат бойы кәсібилігін шыңдайды. «Немеремнің мінезі салмақты, табанды, мақсатына жетпей дамыл таппайды» дейді атасы.
Қайрат Мақажанов, атасы:
Кубокты көтергенде Қазақстан мемлекетінің гимні ойнай бастады. Сол кезде көзіме жас келді. Бұл біздің отбасымыздың ғана жетістігі емес, бұл еліміздің жетістігі деп көңілім босады.
Жас чемпион биыл мектеп табалдырығын аттайды. Қазірден-ақ есепке жүйрік. Сондықтан оның алғыр, білімді бала болатынына ата-анасы сенімді. Шахматтан бөлек, үлкен тенниспен әуестенеді. Артынан ерген інісі де Абдул-Мәліктің жолын қуып келеді.
Ақниет Балтанова
