Жаңалықтарды Telegram арнамыздан оқыңыз!Елімізде SIM-карталарды сатып алу кезінде биометриялық сәйкестендіру жүйесі енгізіліп жатыр. Бұл туралы Үкімет отырысында цифрлық даму, инновациялар және аэроғарыш өнеркәсібі министрі Жаслан Мәдиев айтты. Ал Премьер-министр Олжас Бектенов шалғай елдімекендерді интернетпен қамту және халыққа қызмет көрсету орталықтарындағы сұранысы мол қызмет түрлерін онлайн форматқа көшіруді тапсырды. Бұдан бөлек, жыл соңына дейін жасанды интеллект элементтерін іске қосу арқылы Электрондық үкімет порталын жаңғырту қажет.
Қазақстанда тіркеліп жатқан жалпы қылмыстың 34 пайызы – алаяқтық. Оның тең жартысы — интернет-алаяқтық. Өйткені қазір кез келген адам ақшасы жеткенше қаптатып абоненттік номер сатып ала береді. Тіпті азық-түлік дүкендерінде де SIM-картаның саудасы қызып тұр. Салдарынан телефон арқылы азаматтардың ақшасы үптеліп жатыр. SIM-картаның санын шектейтін заң жобасы Мәжілісте қаралып жатыр деген ақпарат бар. Оның үстіне енді нөмірді сатып аларда түріңізге қарап барып беретін болады.
Жаслан Мәдиев, ҚР Цифрлық даму, инновациялар және аэроғарыш өнеркәсібі министрі:
Жаңа SIM-карталарды сатып алу кезінде биометриялық сәйкестендіру енгізіліп жатыр. SIM-карталарды үшінші тұлғаларға заңсыз беру және simbox-тарды заңсыз пайдалану жағдайларына қатысты жауапкершілік күшейтілуде.
Халыққа қызмет көрсету орталықтарының жұмысына қатысты шағым көп түсіп жатыр. Үкімет басшысы осылай деп, ақпараттық жүйелердің тоқтап қалып жатқанын айтты. е-Gov платформасы 2013 жылы іске қосылған. Одан бері цифрлық мүмкіндіктер артып, қызметтердің түрі де көбейді. Сондықтан ескірген еGov-ты, жаңасына алмастыру керек.
Ростислав Коняшкин, ҚР Цифрлық даму, инновациялар және аэроғарыш өнеркәсібі вице-министрі:
eGov 3.0 жүйесі — толық жаңартылған, қайта жасалған портал. Өткен жылдан бері біз кейбір компоненттерді іске қоса бастадық, олардың бір бөлігі биыл жаңартылып жатыр. Екі жылда барлық сервис пен компонент өзгереді. Ал биыл жаңартылған, ыңғайлы әрі тұрақты жұмыс істейтін порталдың жаңа нұсқасын көресіздер.
Сәуірдің соңына дейін жеке куәлікті ауыстыру процесі толығымен онлайн форматқа көшіріледі. Енді фотосуреттің талаптарға сәйкестігін маман емес, жасанды интеллект-модель бағалайды. Осылайша шамамен 1 млн адам бұл тетіктің игілігін көретін болды.
Олжас Бектенов, ҚР Премьер-министрі:
Сонымен қатар Мемлекет басшысының тапсырмасына сәйкес, Қазақстанда жасанды интеллектіні белсенді түрде енгізу керек. Бірінші кезекте электрондық үкімет платформасында осыған басымдық берілуі тиіс.
Былтыр мемлекеттік қызметтер 341 млн рет көрсетілді, оның 91 пайызы электронды түрде ұсынылды. Мысалы, қазір жүргізуші куәлігін екі батырманы басу арқылы ауыстыруға болады. Бұл тетікті 7 мыңнан астам қазақстандықтар пайдаланған. Қазір цифрдан сиқыр жасалып жатқан заман. Табалдырық тоздырып, уақытты умаждап, жүйкеге жүк түсірмейміз. Ең бастысы цифрлық жүйе – сыбайлас жемқорлыққа қарсы күрестің тиімді құралы.
Азамат Бейбітұлы
