Жаңалықтарды Telegram арнамыздан оқыңыз!Газа секторында Израильдің шабуылдарынан сейсенбіден бері 700-ге жуық адам қаза тапты. Мұны «ХАМАС» үкіметінің денсаулық сақтау министрлігі хабарлап отыр. Оның дерегінше, құрбандардың 400-і әйелдер мен балалар. Сонымен қатар «Хамастың» бірнеше жоғары лауазымды өкілі мерт болған. Бүгін Газада опат болғандарды жерлеу рәсімі өтіп жатыр.
Ахмед Әбу, қаза тапқан палестиналықтың туысы:
Бүкіл әлем бәрін көріп отырса да ештеңе болмағандай сыңай танытып отыр. Осы соғыс басталғалы Газада 50 мыңнан астам адам қаза тауып, 100 мыңдайы жараланды. Адамгершілігіміз қайда? АҚШ-та, Лондонда немесе Францияда біреу нақақтан-нақақ өлтірілсе, дүние жұрты көтеріліске шығады ғой.
«ХАМАС» пен Израиль арасындағы 15 айлық соғыс қаңтардың 19-да тоқтады. Бірақ атысты доғару туралы келісімнің екінші кезеңінде тараптар тұтқындарды босату мен өзге мәселелер бойынша уағдаласа алмады. Сондықтан өткен сейсенбіде Израиль Газаға қайтадан соққы бере бастады.
Арыстан Рысбек
