Жаңалықтарды Telegram арнамыздан оқыңыз!Ақтөбе облысында биыл су тасқыны былтырғыдан да қауіпті болуы мүмкін. Мамандардың болжамы көңіл көншітіп отырған жоқ. Жердің тоңы қалың, қар да көп жауды. Әсіресе өзен жағасында тұратын халыққа сақ болған жөн. Қазір өңірде тасқынға тосқын қою жұмыстары қарқынды жүріп жатыр.
Жақсыбек Кемал, тілші:
Қазір біз Елек өзенінің жағалауында тұрмыз. Бір жыл бұрын ол арнасынан асып, мына менің артымдағы үйлер толықтай су астында қалған еді. Биыл өңірге қар екі есе қалың жауды. Яғни қауіп одан да жоғары деген сөз.
Былтырғы су тасқыны кезінде облыста 4,5 мыңнан астам үйге су кірді. Мыңға жуық баспана апатты деп танылды. Олардың көбі өзенге жақын орналасқан. Саяжайларда тұратын халықтың мүддесін қорғап жүрген қоғам белсендісі Вазих Ақтаевтың айтуынша, қазір облыс орталығындағы бау-бақша ұжымдарында 70 мыңнан астам халық бар. Оның үштен бірі табиғи апаттан зардап шегуі мүмкін.
Вазих Ақтаев, қоғам белсендісі:
Мына су арнасында тұрып жатқан саяжайлардағы шамамен 20 мыңдай адам қиындық көруі мүмкін. Құжаттарын дайындап қоюы керек. Көбіне тұрмыстық техника жарамсыз болып қалады, былтыр да зардап шеккен сол техника. Өзімнің ұсынысым – мүмкін уақытша қойма алып, адамдар алдын ала тоңазытқыз, телевидидарларын қойып қойса.
Синоптиктер айдың ортасынан бастап күн күрт жылиды деп отыр. Сондықтан жауапты мекемелер тасқынға қарсы шараларды жеделдетті. Бүгін Ақтөбе қаласы мен 8 ауданда өзендердегі мұзды жару жұмыстары жүріп жатыр.
Әлішер Сарыбаев, ТЖД бөлім бастығы:
Әдейі мамандар шақырылды басқа облыстан. Олар өздерінің мұз жару лицензиясы бар мамандар, жұмысын біледі. Олар осы жұмыстың алдында бір ай бұрын Ақтөбе мен аудандарда барлау жүргізіп кеткен еді.
Құтқарушылар бір жыл бұрынғы жағдайдан сабақ алдық дейді. Маман мен техника сақадай сай тұр. Қазір өзен арналары мен арықтар тазартылып, елдімекендердегі қар сыртқа шығарылып жатыр.
Айбат Жаңабергенов, ТЖД бастығының орынбасары:
Жергілікті атқарушы органдармен бірлесіп, осы су тасу қауіпнің алдын алуға крісіп кеттік. Атап айтсақ, 2 600-ден астам адам, 800-ден астам техника, жүзден аса жүзу құралы, сонымен қатар 40 су сору құралы дайындалды.
Табиғаттың дүлей күшіне төтеп беру оңай емес. Егер жағдай қиындай қалса, Маңғыстау мен Қызылорда облыстарының құтқарушылары өңірге көмекке келуге дайын отыр.
Жақсыбек Кемал
