Жаңалықтарды Telegram арнамыздан оқыңыз!Осыдан бес жыл бұрын Астанада жұмыс істейтін жастарға сатып алу құқынсыз алғашқы жалға берілетін тұрғын үй бағдарламасын іске қосты. Бұл мыңдаған қала тұрғынына бес жыл ішінде өз үйлерін сатып алу үшін ақша жинауға мүмкіндік берді. Енді осы айдың аяғына дейін жасалған келісім-шарт аяқталмақ. Яғни жастар пәтерін босатуы тиіс.
Мерей Ақпарова 2019 жылы іріктеуден өтіп, жастарға арналған жалдамалы пәтерді алған. 5 жыл ішінде ақша жинап, бастапқы жарнасын төлеп, күні кеше өз баспанасын сатып алды.
Мерей Ақпарова, қала тұрғыны:
26 наурызда біздің договордың уақыты бітеді. Амандық болса, өз үйімізге көшіп жатырмыз. Әкімшілікке алғысымыз шексіз, мұндай мүмкіндік үшін. Артымызда келе жатқан жастарға да үлкен мүмкіндік болады деген сенімдемін.
Жастар санатындағы Мерей секілді 3 мыңнан астам адам жалдамалы пәтерде 5 жыл бойы тұрды. Қазір оның 200-ден астамы пәтерді босатқан. Ал өз басапасына әлі қол жеткізе алмағандарға арнап, «Елорда жастары» бағдарламасында жеңілдік қарастырылған. Олар 20 миллионға дейінгі пәтердің бастапқы 10 пайызын төлеп, 19 жылға 5 пайызбен несие ала алады.
Дария Батенова, «Отбасы Банк» АҚ орталық филиалы директорының орынбасары:
Астана қаласы бойынша 18 млрд 180 млн ақша бөлінген және 677 адамға несие беру жоспарланып отыр. Бұл Елорда бағдарламасының аясында.
Ал әкімдік жастарға бас-аяғы 3220 пәтерді жалға берген. Олардың ішінде алғашқы болып баспана алған жастардың келісім-шарты аяқталуға тақағанын айтып, жазбаша түсініктеме берді.
Астана қаласының әкімдігі
2019 жылы іске асырылған бағдарлама шеңберінде қоныстанған жастардың пәтерді жалдау мерзімі аяқталады. Бүгінгі күні жұмыс істейтін жастар санаты бойынша 800 жалға алушымен келісімшарттың мерзімі аяқталғаннан кейін тұрғын үйлерін босатуы тиіс.
Ал босатылған пәтерлер әрі қарай кезекте тұрған тек әлеуметтік осал топтағы азаматтарға және басқа да жастарға жалға берілмек.
Азамат Бейбітұлы
