Жаңалықтарды Telegram арнамыздан оқыңыз!«Қызылорда – Жезқазған» автожолының құрылысына қиыршық тас таситын жүк көлігінің жүргізушілері жұмысқа шығудан бас тартып отыр. Оған себеп 200-ге жуық адам үш айдан бері маңдай тер еңбекақысын ала алмай келеді.
Жүк көлігін тізгіндеген жүргізушілер қытайлық компанияларға жалдамалы қызмет көрсетіп, жол құрылыс материалдарын тасымалдаумен айналысқан. Бірақ желтоқсан айынан бастап жалақы алмай, әбден сергелдеңге түскен шопырлар жаппай наразылық білдіріп, қордаланған қарызды жабуын талап етіп отыр.
Серік Пернешов, көлік жүргізуші:
Күнкөрісіміз жалпы осы жүк көлігінің арқасында ғой. Ақшамызды алмағанымызға үш ай болды. Кредитті кредитпен төлеп жатқан жағдайымыз бар. Әрқайсымыздың отбасымызда бала-шағамымыз бар. Олардың киімі-тамағы бар дегендей. Қазір шындығына келгенде қиналып кеттік.
«Қызылорда – Жезқазған» автожолының бүгінде облыс аумағында құрылыс жұмыстары әлі толық аяқталған жоқ. Дегенмен осы күні екі мердігер мекеме тарапынан жүк көлік иелеріне 800 млн теңгедей берешек қалыптасқан. Алайда жол салушы қытайлық компаниялар атқарған жұмысына сәйкес тапсырыс берушіден уақытында қаржысын алып келген.
Ю Ван, қытайлық компания өкілі:
Бізге бас офисімізден қаражат аударылуы керек болатын. Бірақ кешіктіріліп жатыр. Оны өзіміз де асыға күтіп отырмыз. Ол жақта біраз құжатқа қол қойылған соң ақша жіберіледі. Бірден бола қоймайды. Бұл жобаны аяқтауды мақсат етіп келдік. Еңбекақысын сұрап жүрген жүргізушілерді де түсінеміз және мәселені барынша жақын арада шешуге тырысамыз.
Әділбек Серікұлы
