Жаңалықтарды Telegram арнамыздан оқыңыз!Қытай автокөліктерінің сапасына қатысты шағым көбейді. Тұтынушылар құқығын қорғау комитеті өздеріне түскен арыздарды саралай келе осындай ақпарат таратты. Көп жағдайда автосалондар ақауды жылдам жөндеп бермей жүріп алады. Бұл автокөліктердің ғана емес қызмет көрсетудің де сапасы нашар екенін көрсетеді дейді мамандар. Тақырыпты Оңғар Алпысбайұлы жалғастырады.
Аты-жөнін жасыруды өтінген Астана тұрғыны күзде автосалоннан су жаңа көлік сатып алған. Бірақ, қуанышы көпке созылмапты. Араға 2,5 ай салып, көлігінен өртенген пластиктің иісі шыққан. Кепілдік бойынша тексертеді, ақау анықталмайды. Тағы екі күн өткен соң тұрақта тұрған көлігінен от тұтанған.
Бірден автосалонға арыз жазады. Жылдам көмек көрсетілмегендіктен өртенген көлігін салон ғимаратының алдына апарып қойған. Бейтарап компанияға сараптама жасатып нәтижесін де апарған. Желтоқсан айының 2-сі күні өртенген көлік сол қалпы тұр. Автосалон өз мамандарына қайта сараптама жасатпақ.
Әнуар, қала тұрғыны:
Мен автосалонға күнде жұмысқа барғандай барып жүрдім. Нәтиже жоқ. Көлігіме берген кепілдіктері жұмыс істемейді. Жаңа көлікті алғанда міндеттеп сатқан КАСКО сақтандырулары көлік құнының тек жартысын төлейтінін айтты. Менің әр ісімді, әр сөзімді дәлелдейтін құжат бар. Сондықтан сотта көлігімнің толық құнын және моральдық шығынды қайтарып беруді талап етемін.
Мұндай мәселемен мемлекеттік органға шағымданғандар аз болмай шықты. Былтыр көлікке қатысты 63 өтініш түскен.
Шәкірім Қайдар, ҚР Сауда және интеграция министрлігі Тұтынушылар құқығын қорғау комитетінің сарапшысы:
2024 жылдың қорытындысы бойынша 58 тұтынушының жалпы сомасы 810 млн теңге болатын құқығы қорғалды. Оның ішіне кіретіндері сотқа дейінгі тәртіпті немесе соттың шешімі арқылы автокөлік үшін қаражатты қайтару. Сол маркалі немесе басқа маркалы автокөлікке айырбастау және кепілдік бойынша жөндеу жұмыстарын жүргізу және т.б. осындай жағдайлар кіреді.
Мамандар жаңа көлік сатып аларда оның өзін ғана емес, өндіруші мен жеткізуші туралы ақпаратты зерттеуге, кепілдік шарттарымен мұқият танысуға кеңес береді. Анықталған ақау бойынша 10 жұмыс күні ішінде жауап болмаса мемлекеттік органдарға арыздану қажет. Дей тұрғанмен біздің кейіпкеріміз барлық органға шағымданғанымен нәтиженің болмағанын айтты. Ендігі үміті тек сот шешімінде.
Оңғар Алпысбайұлы
