Жаңалықтарды Telegram арнамыздан оқыңыз!Атырау облысының Жылыой ауданында 2 мыңнан астам жұмыссыз қалды. Теңіз кен орнындағы зауыттың құрылысы аяқталғандықтан, азаматтар жұмыстан жаппай қысқарып жатыр. Дегенмен екі қолға бір күрек таппай қалғандарға арнайы жоба әзірлеген. Жұмыссыздық қалай шешіледі? Әріптесім Нұрсұлтан Нұрсейіт тарқатады.
Алтынбек Хасанов он жылдан бері Теңіз кен орнында саты құрушыболып жұмыс істеді. Осыдан екі ай бұрын жұмыстан қысқарып қалған. Мансап орталығына құжат тапсырғанымен әлі қоңырау күтіп жүр.
Алтынбек Хасанов, Құлсары қаласының тұрғыны:
Алпауыт үш зауыт жұмыс істеп тұрғанда Құлсары қаласының тұрғындары неге жұмыссыз жүрміз деп ойлайды. Тұрғындар жұмыспен қамтамасыз етілсе, жақсы болар еді. Қаншама жастар, үлкен кісілер жүр жұмыссыз.
Ауданда жұмыссыздық мәселесі өте өзекті. Облыста 17 мың адам еңбекке тартылмаған, соның 2 мыңнан астамы осы Жылыой ауданында. Басым көпшілігі мұнай компанияларынан қысқартуға ұшыраған.
Теңіз кен орнынан қысқарғандарға ТеңізШевройл компаниясы «Таңдау» жобасын әзірлеген. Бұл арқылы тұрғындар пайызсыз несие алып, өз кәсібін аша алады. Бүгінге дейін 44 азамат қаржылай көмек алып, кәсібін дөңгелетіп отыр. Бір жыл ішінде шағын кәсіпкерлікке 155 млн теңге несие берілген.
Ақылбек Едігеев, аудандық мансап орталығының басшысы:
Биылғы жылда жалғасады деді. Әкімшілік тарапынан ұсынысымызды бердік. Кәсіпкерлерге бермей, осы жұмыссыздықта тіркеуде тұрған «Келешек» кеңею жобасынан босаған азаматтарды қамту керек деп Таңдау жобасына.
Нұрсұлтан Нұрсейіт, тілші:
Жергілікті әкімдік Теңіз кенішіндегі мердігер компаниялармен үшжақты меморандумға қол қойған. Бұдан бөлек тағы 40 ірі кәсіпорынмен келісімге отырмақ. Осылайша мәселе біртіндеп шешіледі дейді. Ал қазір Мансап орталығында 2040 адам жұмыссыздыққа тіркелген болса, бүгінгі күні оның 200-і уақытша, 77-сі тұрақты жұмыспен қамтылған.
Нұрсұлтан Нұрсейіт
