Жаңалықтарды Telegram арнамыздан оқыңыз!Талдықорғандағы Достық үйінде Қазақстан Халқы Ассамблеясының 30 жылдығына арналған мемориалдық тақта ашылды.
Жетісу өңірінде 70-тен астам ұлт өкілі тату-тәтті, береке бірлікте өмір сүріп келеді. 21 этно-мәдени бірлестік салт-дәстүрін, тілі мен ділін мәдениетін өскелең ұрпаққа насихаттап келеді. Салтанатты жиында қоғамдық институттың ардагерлері, облыс әкімінің «Құрмет» грамоталары мен «Алғыс хаттарына» ие болды. Алғыс айту күніне орай жиналған қауым Қаратал ауданында орналасқан «Қазақ халқына мың алғыс» монументіне гүл шоқтарын қойды. 1937-жылдың ақпанында дәл осы жерге Қиыр Шығыстан корей ұлтының мыңдаған өкілі жер аударылған. Бұл ескерткіш сол сұрапыл жылдары депортацияланған жұртты бауырына басқан қазақ халқына корейлердің зор ілтипаты ретінде қойылған.
Валерий Ан, Корей этно-мәдени бірлестігі ардагерлер кеңесінің төрағасы:
Корей этносының қазақ халқына деген алғысы шексіз. Қиын-қыстау заманда, өздерінің жағдайы мүшкіл бола тұра бізді аман алып қалды. Бір үзім нанын, бір кесе сүтін бөліп, жарты бөлмесіне паналатты. Осылайша біздің әкелеріміз тірі қалып, біз де ұрпақ өрбіттік. Әйтпесе сол бір сұрапыл қыста 100 пайыз қырылып қалар едік. Біз бұл жақсылықты ешқашан ұмытпаймыз.
Қуаныш Қанатұлы
